ကျောင်းပရိဝုဏ်အတွင်း၌ တိုက်စစ်ဆင်ခြင်း by Lu Cifer on Saturday, October 13, 2012 at 1:55am ·

ရန်ကုန်မြို့ အခြေစိုက်တက္ကသိုလ်ကျောင်းကြီး တစ်ကျောင်းကနေပါမောက္ခဘဝဖြင့် အငြိမ်းစား ယူသွားပြီး ဖြစ်သူ ဆရာတစ်ယောက်နှင့် ကျွန်တော်တို့ မကြာခဏဆိုသလို စကားစမြည် ပြောဖြစ်ပါသည်။ ထိုစကားစမြည်တွင် ကားဆရာက "တိုက်စစ်" အကြောင်းပြောကာ ရယ်ပွဲဖွဲ့ပါသည်။ "တိုက်စစ်" တဲ့။ တက္ကသိုလ်ကျောင်းထဲက တိုက်စစ်။ ဤတွင်ပညာရေးလောကနှင့် တိုက်စစ်ဘာဆိုင်လို့တုန်းဟု ဆန္ဒစောသူ တို့က မေးနိုင်ပါသည်။ ရေလည်အောင်ရှင်းပြပါရစေဦး။

စစ်ရေးလောက၌ တိုက်စစ်၊ ထိုးစစ်၊ ခံစစ်၊ ပြောက်ကျားစစ် စသည် စသည်ဖြင့် သေနင်္ဂဗျူဟာ အမျိုးမျိုးရှိသည်ကို အများအသိဖြစ်ပါသည်။ ယခုက တက္ကသိုလ်ကျောင်းပရိဝုဏ်ထဲက "တိုက်စစ်"။

ထိုဆရာတို့၏ ဘာသာရပ်က အင်္ဂလိပ်ဘာသာဖြင့် သင်ယူကာ အင်္ဂလိပ်ဘာသာဖြင့်ပင် ပြန်လည်ဖြေဆိုရသည့် ဘာသာရပ်ဖြစ်ပါသည်။ သို့ဖြင့် တစ်နေ့စာ မေး-အဖြေလွှာများ စစ်ဆေးအပြီး အမှတ်များ ထည့်သွင်းကြစဉ် သံသယဖြစ်ဖွယ် ခုံနံပါတ်တစ်ခုကို သွားတွေ့လိုက်ကြရသည်ဟု ဆိုပါသည်။ ထိုခုံနံပါတ်ရှင်က ဘာသာရပ်တိုင်း လိုလိုတွင် အမှတ်ကောင်းကောင်း မြင့်မြင့်တွေရထားပြီး တစ်ခုတည်းသော ဘာသာရပ်၌ အလွန်ညံ့ဖျင်း စုတ်ပြတ်သည့် အမှတ်ကိုသာရထားသည်ဟု ဆိုပါသည်။

ဤတွင် ဆရာ၊ ဆရာမကြီးအချို့တို့ သံသယဖြစ်ကာ ထိုညံ့ဖျင်းစုတ်ပြတ်သည့် အဖြေလွှာကို ထုတ်ကြည့်ရာ ခေါင်းနားပန်းကြီးသွားကြရသည်ဟု ဆိုပါသည်။
အကြောင်းမှာ အလွန်တရာ အဆင့်အတန်းမြင့်သည့် အင်္ဂလိပ်စာအရေးအသားဖြင့် ဘာသာရပ်ကို ပိုင်ပိုင်နိုင်နိုင် ဖြေဆိုထားကြောင်းတွေ့လိုက်ရသောကြောင့်ဟု ဆိုပါသည်။ သို့ဖြင့် ထိုအဖြေလွှာစစ်ဆေးသည့် နည်းပြဆရာမ ကို ခေါ်ရပါသည်။ ဘယ်လိုစစ်ဆေးသလဲ မေးရပါသည်။ ဆရာမကလည်း ရိုးရိုးသားသားပဲဖြစ်ပါသည်။ မည်သည့် ပယောဂတစ်စုံတစ်ရာမှ မရှိပါ။



သူက ပို့ချချက် စာအုပ်ကို လက်ကိုင်ထားသော ဆရာမကလေးဖြစ်သည်။ ပို့ချချက်ထဲက ဝါကျတွေ၊ စာပိုဒ် တွေကို သူအကုန်မှတ်မိသည်။ ယခု အဖြေလွှာ ထဲက ဝါကျတွေ၊ စာပိုဒ်တွေကို သူတစ်ခါမှ မတွေ့ဖူး။ သို့ဖြင့် ပို့ချချက်စာအုပ်ကြီးကို ရှေ့တွင်ချကာ တိုက်ကြည့်သည်။ မတူ။ လုံးဝ မတူ။ သို့ဖြင့် အမှတ်ကို တော်စွ လျော်စွပေးကာ ချထားလိုက်ခဲ့ခြင်းဖြစ်ပါသည်။ ဆရာကြီး၊ ဆရာမကြီးတို့ ရယ်လည်းရယ်၊ မောလည်းမော၊ ထိုဆရာမကလေးကိုလည်း သွန်သင် ဆုံးမကာ ပြန်လည်ပြင်ဆင်စစ်ဆေး ပေးခဲ့ကြရကြောင်း ဇာတ်လမ်းပင် ဖြစ်ပါသည်။

"နောက်မှ သိရတာက အဲဒီစာဖြေသူက မိဘတွေအလုပ်တာဝန်ကြောင့် ပြည်ပမှာတော်တော် ကြာကြာ နေခဲ့ဖူးတဲ့သူတဲ့ . . . အင်္ဂလိပ်စာ အရေးအသား သိပ်ကောင်းတာ၊ ကျုပ်တို့ ဆရာမကပို့ချချက် စာအုပ်နဲ့ တိုက်ပြီးစစ်တာ . . . မတူတော့မှားတယ်ထင်တာ။ အဲဒီမှာ ရယ်ရင်းမောရင်း ဆုံးမရတာ နောင် တိုက်မစစ်နဲ့ တိုက်စစ်က အန္တရာယ်များတယ်လို့"
ပါမောက္ခဟောင်းကြီး တဝါးဝါးရယ်နေသည်ကိုကြည့်ကာ ကျွန်တော်လည်း သူ့နောက်က လိုက် ရယ်နေမိပါ သည်။ စာအုပ်ကြီးထဲကနဲ့ တူ၊ မတူကို တိုက်ပြီးစစ်လို့ "တိုက်စစ်" တဲ့။ အော် ကျောင်းပရိဝုဏ်အတွင်းက တိုက်စစ်များ။

"တိုက်စစ်" အန္တရာယ်က ပညာရေးလောကအတွက် ကြီးလွန်းလှပါသည်။ ၏ သည် မလွဲ ပြန် ပြောနိုင်လျှင် လူတော် မပြောနိုင်လျှင် လူညံ့အဖြစ် ဆရာ၊ ဆရာမများ ကိုယ်တိုင်က သဘောထားနေကြသည်ကို မပြင်ဘဲနှင့်တော့ဘာမှ ဖြစ်လာလိမ့်မည် မထင်ပါ။ ရန်ကုန်မြို့၌ ရွှေတိဂုံစေတီတော်ရှိပါသည် ဟူသည့် ဝါကျကို ပင်လျှင် "ရွှေတိဂုံစေတီတော်သည် ရန်ကုန်မြို့၌ရှိသည်" ဟု ပြန်မရေးရဲသော ကလေးတွေကို နေရာတိုင်းမှာ ကျွန်တော်တို့တွေ့နိုင်ပါသည်။
ဆရာ သို့မဟုတ် ဆရာမက သူရေးပေးတဲ့အတိုင်း မရေးရင် အမှတ်မပေးဘူးဟု ဆိုကာ စိုးထိတ်နေကြပါသည်။ ခြေလေးချောင်းသတ္တဝါသုံးမျိုးကို ဆရာ၊ ဆရာမက ခွေး၊ ကြောင်၊ နွားဟု ရေးပေးထားသည်ဆိုပါတော့။ ကလေးက ဆင်တို့၊ ကျွဲတို့၊ မြင်းတို့၊ ဆိတ်တို့ကို မရေးရဲ။ ရေးလျှင် အမှတ်မရမှာ (သို့မဟုတ်) ဆူမှာ (သို့မဟုတ်) အငြိုငြင်ခံရမှာကို စိုးထိတ်နေရသည့် အနေအထားဖြစ်ပါသည်။

ဝါကျကလေးများ စကားလုံးကလေးများကိုပင်လျှင် လွတ်လွတ်လပ်လပ် ကိုယ်ပိုင်ဆုံးဖြတ် ချက်နှင့် ချမရေးရဲမှတော့ အတွေးအခေါ် အယူအဆတွေကို ချပြရဲ၊ တင်ပြရဲဖို့ဆိုသည်မှာ ဟိုး အဝေး ကြီးမှာပါ။

ပြင်သစ်နိုင်ငံ၌ ပညာသင်ကြားကာ မြန်မာနိုင်ငံမှာ ဟိုတယ်တွေလာဖွင့်နေသူ သွက်လက်ထက်မြက်သော ရှမ်းသမီးပျိုကလေးတစ်ဦးနှင့် အင်းလေးကန်ဘေးက သူတို့ဟိုတယ်ထဲမှာပင် စကားဝိုင်းဖွဲ့ဖူးပါသည်။ မိုးလေဝသဆရာကြီး ဒေါက်တာဦးထွန်းလွင်တို့၊ ဆရာချစ်ဦးညိုတို့၊ မနုနုရည် (အင်းဝ)တို့လည်း ထိုမိန်းကလေး ကို ကောင်းကောင်း သိပါသည်။

သူက ဆိုကြပါစို့တဲ့။ ပြင်သစ်စာရေးဆရာကြီး ဗစ်တာဟူးဂိုး (Victor Hugo) ကိုသင်သတဲ့။ ဆရာ၊ ဆရာမက ဗစ်တာဟူးဂိုး (Victor Hugo) ပြောတာကိုကြိုက်၊ မကြိုက် လက်ခံ၊ လက်မခံမေးသတဲ့။ လက်ခံရင် ကြိုက်ရင် လက်ခံကြောင်း ကြိုက်ကြောင်းရေး၊ လက်မခဲဘူး မကြိုက်ဘူးဆိုရင်လည်း လက်မခံကြောင်း မကြိုက်ကြောင်း ရေးတဲ့။
ကျွန်တော်တို့ကတော့ မှတ်စုများကိုပင် ရိုက်နှိပ်ထုတ်ဝေကာ ကျောင်းသား၊ ကျောင်းသူများဆီသို့ ရောင်းချဝေငှ ထားလိုက်ပါသေးသည်။ အဲသည့် စာအုပ်ထဲကအတိုင်း ဖြေဆိုကြပေတော့။

ငါရေးချပေးထားတဲ့ ဝါကျအတိုင်းပဲ ရေး။ မကွန့်နဲ့။ ငါတွေးပြပေးထားတဲ့အတိုင်းပဲတွေး။ မတွန့်နဲ့။ ငါတွက်ပြ ပေးထားတဲ့အတိုင်းပဲတွက်။ မညွန့်နဲ့။ ငါခံစားပြထားတဲ့အတိုင်းပဲ ခံစား။ မလွန့်နဲ့။
ဒါကို ကျွန်တော်က အာဏာ၏ အရိပ်ဟုထင်ပါသည်။ စာသင်ခန်းထဲသို့ အာဏာ၏ အရိပ်များ လွှမ်းမိုးလာခြင်း ဖြင့် ပညာရေးလောကသည်လည်း အခြားသောလောကများနှင့်အတူ ဆွံ့ အ ကြုံလှီ ညှိုးနွမ်း ခြောက်သွေ့ သွားခဲ့ရခြင်းဖြစ်ပါသည်။

အလွတ်ကျတ်ထားသည်ကို တစ်သဝေမတိမ်း ပြန်ရွတ်ပြ ပြန်ရေးပြသည်ကို Factual Recall ဟု ခေါ်ဆိုရာ ထိုဖက်ကျူရယ်ရီကောလ်သည် Reasoning Power ခေါ်ဆင်ခြင်ခြင်း၏ ရန်သူ၊ Critical Thinking ခေါ် ဝေဖန်သုံးသပ်ခြင်း၏ ရန်သူ၊ Decision Making ခေါ်ဆုံးဖြတ်ချက်ချခြင်း၏ ရန်သူ၊ Problem Solring ခေါ် ပြဿနာဖြေရှင်းခြင်း၏ ရန်သူပင် ဖြစ်ပါသည်။

စာအုပ်ထဲကအတိုင်း ပြန်ချရေးနိုင်၊ မရေးနိုင်စစ်ဆေးသော "တိုက်စစ်" သည် Factual Recall ပင် ဖြစ်ပါသည်။
ယခုအာဏာ၏ အရိပ်ကိုဖယ်ကာ ဒီမိုကရေစီရေးသို့ ရှေးရှုနေသောကာလ၌ ကျောင်းပရိဝုဏ်များအတွင်းတွင် "တိုက်စစ်" ရှိနေသေးသည်ဆိုလျှင် ဆရာ၊ ဆရာမတို့ကိုယ်တိုင်က အာဏာအရိပ်အောက်က မလွတ်မြောက်နိုင် ကြခြင်းပင် ဖြစ်ပါသည်။ ငါရေးတဲ့ ငါတွေးတဲ့၊ ငါတွက်တဲ့၊ ငါချက်တဲ့အတိုင်း ရေး မရေး၊ တွေး မတွေး၊ တွက် မတွက်၊ ချက် မချက် တိုက်စစ်ကြည့်သော ဓလေ့။

ကျောင်းပရိဝုဏ် တွေထဲမှာ "တိုက်စစ်" ရပ်ပါတော့။         ။

မောင်သာချို
7 Day News Journal

မောက္ခပညာရေးမဂ္ဂဇင်း
http://www.maukkha.org/index.php/interview-maukkha/opinion-maukkha/2378-2012-10-13-07-19-52