သူတို့ခေါ်တော့ဒုက္ခသည်၊ကိုယ့်ကိုယ်ကိုတော့တော်လှန်ရေးသမား။ အပိုင်း(၇) by Ko Nyo on Wednesday, January 16, 2013 at 4:00pm ·

သူတို့ခေါ်တော့ဒုက္ခသည်၊ကိုယ့်ကိုယ်ကိုတော့တော်လှန်ရေးသမား။
                                                                                     အပိုင်း(၇)

“ကြိတ်ထားဟ..ကြိတ်လိုက်စမ်း“.
“၀က်ကြီးကွ”….“ညိုကြီးကွ.”
“၀ါးမနေနဲ့မြိုချလိုက်.မြိုချလိုက်”..
“ရော့..နောက်တတုံး”
“မောင်ညိုအရှုံးမပေးနဲ့..ကြိတ်ထား..ဘိုက်ကလေးလှုပ်ပြီးဝါး”
“ဝေး၊ဝေး၊ဝေး၊ဝေး…”
ကျနော့စားပွဲခုန်ရှည်ကြီးမှာမျက်နှာချင်းဆိုင်မတ်တပ်ရပ်ပြီးဝက်ဆီတုံးကြီးတွေ
ပလုတ်ပလောင်းမြိုနေတဲ့ဝက်ကြီး(ဇော်နိုင်မန်းဆေးတက္ကသိုလ်)ရဲ့အခြေအနေ
ဘယ်လိုနေမယ်မသိ၊ကျနော်ကတော့ခေါင်းတွေမူးပြီးမျက်လုံးတွေဝါးနေပြီ၊
ဘိုက်လည်းပြည့်လျှံပြီးအီလည်လည်ဖြစ်နေပြီ။
ဒါပေမဲ့ဝက်ကြီးကိုတော့အရှုံးပေးလို့မဖြစ်၊
သူက၀က်သားကိုဘယ်နှစ်ပိဿာကုန်အောင်တထိုင်ထဲအပြတ်စားနိုင်တယ်ဘာညာနဲ့
အသားငတ်ရတဲ့အထဲတချိန်လုံးကြွားခဲ့တာ။
တကယ်လည်းသူကတရုတ်လူမျိုးပီပီဝက်သားကကြိုက်သလိုဖြူဖြူ၀၀နဲ့အသကုန်ဆွဲနေတယ်။
ကျနော်ကလည်းငယ်ငယ်ကတည်းက၀က်သားကြိုက်။ဝက်သားဆိုရင်အဆီတုံးမှဝါးတာ။
ဘေးကလူတွေအကုန်လုံးကျနော်တို့၂ယောက်အကြိတ်အနယ်ဝက်ဆီတုံးအစားပြိုင်နေတာကို
လက်ခုတ်လက်ဝါးတီးဝိုင်းအားပေးနေတယ်။
ဟိုကဒီကတယောက်ပြီးတယောက်စားမကုန်လို့ပစ်ထည့်ပေးနေတဲ့လက်သီးဆုတ်လောက်
ဝက်ဆီတုံးကြီးတွေကတတုံးပြီးတုံးသူ့ပန်းဂံရော၊ကိုယ့်ပန်းဂံမှာရောပြည့်နေတယ်။
တချို့အတုံးတွေကအခေါက်တောင်ပါမလာ၊အဆီချည်းသက်သက်ဖွေးလို့။
၂ယောက်လုံးအလျော့မပေးဖူး။ပန်းဂံထဲကအဆီတုံးအပုံလိုက်ကိုကြည့်ပြီး
တတုံးပြီးတတုံးဖြိုနေတယ်။
ဘေးကလည်းကျနော်တို့ဝက်ဆီတုံးတွေအီလည်လည်ဝါးနေတဲ့မျက်နှာတွေကြည့်ပြီး
ဟားတိုက်နေကြတယ်။
နောက်ဆုံးတော့ဝက်ကြီး“အေ့”ကနဲတချက်ပျို့တက်လာပြီး၊
“မရတော့ဖူးဗျာ..ကျနော်အရှုံးပေးတယ်”လို့ပြောပီးအစားရပ်လိုက်တယ်။
ကျနော်ကတော့မဆလစစ်တပ်ကြီးကို(ရမ်ဘိုလို)တကိုယ်တော်ချေမှုန်းအောင်နိုင်တဲ့ဟန်နဲ့..
ဝက်ဆီတုံးအပြည့်ပန်းဂံ၂ချပ်လုံးကိုပင့်မြှောက်ပြီးအောင်ပွဲခံလိုက်ပါတယ်။
“ဝေး..ဟေး..ညိုကြီးကွ၊မန္တလေးသားဝက်ကြီးကိုအလဲထိုးပြီး
ဝက်ဆီဖတ်ချန်ပီယံဆုဆွတ်ခူးသွားပါပြီခင်ဗျား”
ကိုကျော်ကြီး(ကျောက်မဲကျော်ကြီး)ကကျယ်လောင်တဲ့အသံကြီးနဲ့
ဝက်ဆီဟဲဗီးအစားပြိုင်ပွဲကြီးကိုအဆုံးသပ်ပေးလိုက်ပါတယ်။


တကယ်တော့ကျနော်တို့တတွေတလနီးပါးအသားမစားရပဲငတ်ပြတ်နေရာက၊
ခရစ်စမတ်ပွဲတော်ရက်မှာစားဖို့ဆိုပြီးကျနော်တို့ဒုက္ခသည်စခန်းနဲ့၅မိုင်ကျော်ဝေးတဲ့
“ကွန်မလာသာဗီ”ဆိုတဲ့နာဂရွာကရွာသူကြီး(ဦးချို၊မြန်မာပြည်ပေါက်နယ်မြေခံအမတ်၊
မြန်မာစကားတတ်)နဲ့မဏိပူရပြည်နယ်(အား/ကာဝန်ကြီး၊ယခင်မြန်မာပြည်သား၊နာမည်မေ့နေ)
တို့ဝက်တကောင်ကိုပေါ်ပြီးကျနော်တို့မြန်မာကျောင်းသားလူငယ်တွေညစာစားဖို့လာပေးတာပါ။
ပြီးတော့၊ဘောလုံး၊ဘော်လီဘောဘော်လုံး၊ပိုက်၊စတဲ့အားကစားပစ္စည်းတွေလည်းလာလှုပါတယ်။
အဲဒါပထမဆုံးအသားကိုဝေပုံကျခွဲတမ်းရာရှင်နဲ့မဟုတ်ပဲ၊အ၀စားကျွေးခဲ့တာပါ။
နောက်ပိုင်းလအတန်ကြာတော့သူကြီးဦးချိုအိမ်ကိုကျောင်းသားတွေချောင်းဖောက်တော့တာပဲ။
မနှစ်ကပဲဦးချိုဆုံးသွားတယ်။ဦးချိုနဲ့ဇနီးကျောင်းဆရာမကစခန်းကလူတွေကိုသားသမီးတွေလိုချစ်တာ။

အစောပိုင်းကာလတွေကစခန်းအပြင်ထွက်ဖို့နေနေသာသာစခန်းအောက်တောင်ခြေက
ချောင်းထဲအသုတ်လိုက်၊အသုတ်လိုက်ရေချိုးသွားရင်တောင်၊ကသဲအစောင့်ကသေနတ်နဲ့လုံခြုံရေးလိုက်တာ။
ပထမတော့ကျနော်တို့ကိုစောင့်ရှောက်တာလို့ထင်တာ။
နောက်မှကျနော်တို့ဘ၀က
အကျဉ်းသားတွေလိုဖြစ်နေမှန်းသိတာ။
ကျနော်တို့Leikunစခန်း(ကိုယ့်ဖာသာလိပ်ခွံလို့နာမည်ပေးထားတယ်၊အတ္တစွဲတွေများနေလို့)
ရောက်စကအဖွဲ့နာမည်ပေးဖို့စဉ်းစားကြတယ်။
ဦးစီးအဖွဲ့ထဲမှာလည်းနာမည်နဲ့ပတ်သက်ပြီးသဘောထားကအမျိုးမျိုး။
နောက်ဆုံး“ဒီမိုကရက်တစ်မြန်မာကျောင်းသားတပ်ဦး”(BDSF)ဆိုတဲ့နာမည်နဲ့မြေပေါ်နိုင်ငံရေးလောကမှာဝါဒဖြန့်မယ်။မြေအောက်တော်လှန်ရေးအဖြစ်
(BDGF)ဒီမိုကရက်တစ်ပြောက်ကျားတပ်ဦး(မြန်မာနိုင်ငံ)ကိုဆုံးဖြတ်တယ်။
အဲဒီနောက်ပန်းချီစစ်ငြိမ်းအေးကဦးဆောင်ပြီးမြေအောက်ဝါဒဖြန့်စာဆောင်၊စာစဉ်တွေကို
ဒီဇိုင်းလှလှတွေနဲ့နယ်စပ်ကတဆင့်ဖြန့်ချိကြတယ်။
စခန်းမှာလည်းနံရံကပ်စာဆောင်တွေတလ၂ခါလောက်လုပ်တယ်။
အဲဒီတုံးကလူတိုင်းနီးနီးကဗျာတွေစာတွေရေးကြတယ်။ကလောင်သွေးကြတယ်။
စာရေးဆရာကောလ်ထန်မောရိယာယ်ကလည်းညပိုင်းထမင်းစားပြီးရင်
လသာမှန်အိမ်ကြီးနဲ့လုပ်တဲ့ဟောပြောပွဲမှာအားရပါးရကဗျာတွေရွတ်တော့တာပဲ။
သူရွတ်တဲ့“မဏိပူရတောင်တန်းပေါ်ကကြယ်နီများ”ဆိုတဲ့ကဗျာကို
ကျနော်တို့သိတ်သဘောကျတယ်။“အို..အမိမြန်မာပြည်..မျက်ရည်သုတ်လော့၊
မဏိပူရတောင်တန်းမှဆီ..ဧရာဝတီသို့..မကြာမီလာမည်ကြယ်နီများ..”တဲ့..
တချို့ကသူ့ကိုမကြားတကြားနောက်တယ်၊“မကြာမီလာမည်၊ရဖြူဂျီ”ဆိုပြီး။

အဲဒီရဖြူဂျီ(Refugees=ဒုက္ခသည်)ဆိုတဲ့စကားကလည်းကျနော်တို့အတွက်တဒုက္ခ။
ကသဲစစ်သားတွေ၊အရာရှိတွေကရဖြူဂျီလို့ပဲအလွယ်ခေါ်တယ်။
ဘရူးမားရဖြူဂျီပေါ့သူတို့ကတော့ခတ်လွယ်လွယ်ပဲခေါ်တာပေါ့။
မရဖူး၊ကျနော်တို့ဗမာတွေကသိတ်ပြီးဇာတိမာန်ပြင်းထန်တာ။
“No..No..,Don’t call a refugees.We are Freedom fighter”(ကျနော်တို့ကိုဒုက္ခသည်လို့မခေါ်ပါနဲ့၊တော်လှန်ရေးသမားတွေဖြစ်တယ်)လို့ပြောတယ်။
တကယ်တမ်းဆို..ကျနော်တို့ဟာဒုက္ခသည်ဆိုတဲ့စကားလုံးကို
အဲဒီအချိန်ကျမှကြားဖူးကြတာပါ။ဒုက္ခသည်လို့ဘယ်သူမှမခံယူချင်ဖူး။
ကျနော်တို့ဟာဒုက္ခသည်အဖြစ်ဒီနေရာကိုခိုလှုံဖို့လာတာမှုတ်ဖူး၊
အမိနိုင်ငံကိုကယ်တင်ဖို့လာတာဖြစ်တယ်။ကျနော်တို့ဟာတော်လှန်ရေးသမားတွေ၊
ပြောက်ကျားစစ်သည်တွေ..လို့ကိုယ့်ကိုယ်ကိုခံယူထားကြသူတွေဖြစ်တယ်။
ဒါကြောင့်ရဖြူဂျီလို့ခေါ်ရင်အတော်နာတယ်။ဒါပေမဲ့တကယ့်လက်တွေ့မှာတော့ပီဘိရဖြူဂျီ။
ဒုက္ခသည်မှဒုက္ခသည်အစစ်။
ဘယ်လောက်ဒုက္ခသည်စစ်သလဲဆိုရင်
၊ခြေပြတ်နေသလိုဒီတောင်ကုန်းပေါ်ကနေဒီစခန်းကနေဘယ်လူတောထဲမှသွားခွင့်မရှိဖူး၊
မျက်စေ့ကမ်းနေသလို၊ပြင်ပကမ္ဘာကြီးကိုကြည့်ရှုခွင့်မရှိဖူး၊
ရုတ်စွအဆုံးအဖြူအမဲရုပ်မြင်သံကြားလေးတောင်မရှိဖူး။
ကျနော်တို့ဖာသာအစုအစည်းလေးနဲ့သူ့အတွေ့အကြုံ၊ကိုယ့်အတွေ့အကြုံပြောကြ၊ဆွေးနွေးကြ၊
ရီစရာတွေကြံဖန်လုပ်ကြ၊နဲ့မို့သာ၊ရူးသွပ်မသွားကြတာ။
ဒါတောင်ကိုယ်ရည်မှန်းတာနဲ့လက်တွေ့မိုးနဲ့မြေကွာနေလို့
.စိတ်ဓာတ်တွေကျပြီးဂေါက်မလိုလိုဖြစ်နေသူတွေရှိသေးတယ်။
အဖြစ်တွေကအတော်ဆိုး။

ဒီနေရာမှာစားသောက်ရတဲ့အခြေအနေလေးပြောပြအုံးမယ်။
ကျနော်တို့ကကိုယ့်ဖာသာချက်စားမယ်ပြောထားလို့အာလူး၊ဆန်၊ပဲ၊ဆီ၊ငြုပ်သီးခြောက်၊ကြက်သွန်နီ၊
ဆား၊
သကြားစတာတွေကိုလူတယောက်ဘယ်လောက်နှုံးဆိုပြီးခွဲတမ်းရပါတယ်။
ရုံးခန်းဘေးကဂိုဒေါင်လေးထဲမှာတပတ်စာလာပို့ထားတယ်။
ရိက္ခာထုတ်ပေးတဲ့မဏိပူရနယ်သားဇိုမီးချင်းကြီးနာမည်ကရိုခူးမားတဲ့။
သူလာပြီဆိုမျက်နှာနီနီ၊၀ီစကီနံ့သင်းသင်းနဲ့ဒရီးဒယိုင်။နောက်ပိုင်းရိက္ခာမလောက်ငှရင်၊
အောက်စော်နံဆန်နဲ့၊အာလူးအပုတ်တွေပေးတာကြောင့်သူ့ကို
ဒုက္ခသည်ရိက္ခာနဲ့ကြီးပွားနေသူလို့ပဲအားလုံးကမြင်လာတယ်။
ထင်လည်းထင်စရာ၊ကျနော်တို့ကိုပေးတဲ့ဆန်ကမဲညစ်ပြီးအောက်စော်နံရုံမကကြွက်ချေး၊
ခဲ၊သလဲတွေရောနေတဲ့အပြင်ဂုံနီအိပ်အောက်ပိုင်းကအစိုပြန်ပြီးအတောင့်လိုက်အတောင့်လိုက်
ပုတ်နေတဲ့ဆန်တွေပါရောပါနေပါတယ်။
ပုံမှန်ပေးဝေတဲ့ဆန်ကိုကဂဲသလဲနဲ့မှိုတက်တာတွေပါနေတယ်။
နောက်ပိုင်းတော့ရိုးသွားပြီးအဲဒီဝက်စားတဲ့ဆန်တွေကိုလည်းမပြစ်မမြင်ကြတော့ပါဖူး။
မနက်ပိုင်းကျန်းမာရေးလေ့ကျင့်ခန်းတွေလုပ်ပြီးရင်ထမင်းချက်တာဝန်ကျတဲ့ရဲဘော်တွေက
မိုးဗြဲဒယ်ကြီးထဲဆန်အသိုးတွေထည့်ပြီးချောင်းထဲဆင်းတယ်။
ဆန်ထည့်ထားတဲ့မိုးဗြဲဒယ်ကြီးထဲချောင်းရေခတ်ထည့်ပြီးဆေးပါတယ်။
၃ခေါက်လောက်ဆေးပြီးရင်လူ၂ယောက်ကဒယ်ကြီးကိုလှဲ့ပြီးရွှေကျင်သလိုမွှေရတယ်။
အဲဒီနောက်အပေါ်ကဆန်၊အောက်ခြေမှာသဲနဲ့ကျောက်ခဲမဲမဲတွေပေါ်လာပြီး၊
ဆန်နဲ့သလဲကွဲပြားသွားတယ်။
အဲဒီတော့မိုးဗြဲဒယ်အပေါ်ယံကဆန်တွေကိုသီးခြားကော်ခတ်လိုက်တယ်။
တခေါက်ပြီးတခေါက်ရေဖြည့်လိုက်၊ဒယ်အိုးလှုပ်ပြီးရွှေလိုကျင်လိုက်နဲ့
အောက်ဆုံးကဆန်နည်းနည်းနဲ့ကျောက်ခဲသလဲတွေသီးခြားကျန်တဲ့အထိကျင်ရပါတယ်။
ဒါကနေ့စဉ်မနက်တကြိမ်ညတကြိမ်ထမင်းချက်တာဝန်ကျတဲ့တပ်စုတိုင်းလုပ်နေကျပါ။
ဟင်းကတော့၊နနွင်းမှုန့်နိုင်နိုင်နဲ့ချက်ထားတဲ့အာလူးစိတ်သေးသေးလေးရေကျဲကျဲနဲ့
ပဲနီလေးအရည်ကျဲကျဲ(နည်းနည်းပျစ်အောင်ထမင်းရေရောကြတယ်)။

စခန်းမှာထမင်းရေကလည်းသိတ်တန်ဘိုးကြီးတာ။အဲဒီကျမှထမင်းရေဆိုတာ
အင်မတန်အရသာထူးကဲမှန်းသိသွားတာ။မနက်ဗိုက်ဟောင်းလောင်းနဲ့ပြေးလွှားလေ့ကျင့်ခန်းလုပ်ရပေမဲ့
ဘရိတ်ဖတ်စ်(Breakfast)မနက်စာကကျွေးစရာမရှိဖူး။
ဒါပေမဲ့က“ကျငန်း”လို့ခေါ်တဲ့လက်ဘက်ခြောက်နှပ်ရထဲသကြားထဲ့သောက်တယ်။
နို့မပါဖူး။နောက်တခါထမင်းချက်အဖွဲ့ရဲ့“သာလွန်ဂျုစ်”ဆိုတဲ့အသံကိုမျော်ကြတယ်။
အသံကြားတာနဲ့ခွက်လေးတွေကိုင်ပြီးတန်းစီရတယ်။
သူငယ်တန်း
သမိုင်းဖတ်စာထဲက၊သာလွန်မင်းတရားကြီးရဲ့ခြွေတာရေးသာဓကကိုအစွဲပြုပြီး
ထမင်းရည်ကို“သာလွန်ဂျုစ်”လို့ပဲနာမည်ပေးထားတယ်။
ဟင်းကနေ့စဉ်ပဲဟင်းနဲ့အာလူးချည်းပဲ။ချက်တာလည်းတပုံစံထဲ။
ပေးတဲ့ရာရှင်နဲ့ကဒီပုံစံချက်မှအားလုံးလောက်ငှမှာလေ။
တခါတလေ..ထမင်းတောင်မ၀ဖူး။အထူးသဖြစ်လူသစ်တွေတိုးလာတဲ့အချိန်။
ဒီလိုရှိတယ်။ကျနော်တို့ရတဲ့ခွဲတမ်းကလူဦးရည်နဲ့ပေးတာဆိုတော့၊
ဥပမာလူ၁၀၀စာဆိုပြီးရိက္ခာထုတ်ပေးလိုက်တယ်၊
ဒါပေမဲ့နောက်တနေ့လူသစ်တွေ၂၀-၃၀တိုးလာပြီဆို..ရိက္ခာမလောက်ငှတော့ဖူး။
အဲဒီအတိုင်းတပတ်လုံးမလောက်မငစားရတာ။
နောက်တပတ်ကျမှရိက္ခာတိုးတယ်။ဒါပေမဲ့လူသစ်ရောက်လေ..မလောက်ငလေပဲ။

ဒီလိုထမင်းမ၀လို့လဲကျနော်တို့အားလုံးစိတ်မပျက်ပါဖူး၊
လူသစ်တွေရောက်ရင်စိတ်ဓာတ်တွေတက်ကြွပြီးပျော်ကြတယ်။
ကိုယ့်မှာရှိတဲ့စောင်တွေ
အတူမျှခြုံကြတယ်။အရင်ကလူတယောက်စောင်၂ထည်ကနေ
နောက်တော့စောင်တထည်လူ၂ယောက်ဖြစ်သွားတယ်။
လူသစ်တွေလာပြီဆို..ကျနော်တို့တတွေစခန်းအ၀င်ဂိတ်ပေါက်ဝမှာတန်းစီပြီး
“ကျောင်းသားသမဂ္ဂ”သီချင်းတွေ“ဘီအိုင်အေခေတ်စစ်ချီတေးတွေလက်ခုတ်တီးသံပြိုင်ဆိုပြီးကြိုဆိုကြတယ်။
“ငါတို့ရဲ့ဦးခေါင်းများသည်..သွေးချင်းချင်းနီပြီ၊သို့သော်..ညွှတ်ကားမညွှတ်ပါပြီ..
နာဇီတပါတီအမြစ်ကမကျန်..တိုက်ခဲ့ပြီ..ကျောင်းသားသမဂ္ဂတပ်ဦးချီလာပြီ..”
တော်လှန်သီချင်းတွေဝိုင်းဆိုတော့..စခန်းထဲဝင်လာသူတွေလည်းစိတ်ဓာတ်တွေတက်ကြွ၊
ကျနော်တို့လည်းပျော်မြူးကြ။

အဲ..နောက်နောက်ပြောင်ပြောင်တွေလည်းရှိတယ်။
လူသစ်တွေဝင်လာပြီဆိုတယောက်ကဘောပင်၊စာရွက်လေးကိုင်ပြီး
“အသားမစားတဲ့လူဘယ်သူရှိလည်း၊စာရင်းပေးပါ”
“အမဲသားစားလား”“၀က်သားစားလား?”
“သက်သတ်လွတ်ဘယ်နှစ်ယောက်ပါလဲ?”ဆိုပြီး
အတည်ပေါက်စာရင်းတောင်းကြတာမျိုး။လူသစ်တွေကဘယ်သိလိမ့်မလဲ၊
“အကုန်စားပါတယ်”
“ကျနော်အမဲသားမစားဖူး”၊
“ကျနော်ဝက်သားမစားဖူး”နဲ့အဟုတ်မှတ်ပြီးစာရင်းပေးကြတယ်။
အစအနောက်သန်တဲ့ထဲမှာအခု..ခေတ်သစ်ပန်းချီဆရာဆိုပြီးနာမည်ကြီးနေတဲ့
ပန်းချီထိန်လင်းနဲ့စစ်နိုင်(နယ်စပ်မှာကွယ်လွန်)တို့လူရွှင်တော်၂ယောက်ကအကဲဆုံး။
။လူသစ်တွေလာပြီဆို၊“စစ်နိုင်”က၊
ကသဲစစ်ဘိုပုံစံဖမ်းပြီး(စစ်အကျီ၊စစ်ဦးထုတ်နဲ့)ထိန်လင်းကစကားပြန်ပုံစံနဲ့အင်တာဗျူးလုပ်တာပေါ့။
လူသစ်တယောက်ဖြစ်တဲ့ဖျာပုံနယ်က“ကိုတာရာ”ဆို..အတော်ခံလိုက်ရတယ်။
စစ်နိုင်ကကသဲစကားလိုလိုနဲ့ပါးစပ်ထဲတွေ့တာဗလွတ်ချလွတ်တွေလျှောက်ပြောတာ။
ကိုထိန်လင်းကသူစိတ်ကူးတည့်ရာဘာသာပြန်ချင်ရာပြန်တာ။
ဥပမာ“ခင်ဗျားဘယ်လိုစွန့်စွန့်စားစားထွက်လာခဲ့တာလဲ?၊
“အခုစစ်သင်တန်းပေးပြီးရင်လက်နက်ကိုင်ပြီ်းခင်ဗျားတကယ်တိုက်ရဲလား?
“ခင်ဗျားမိသားစုကိုမလွမ်းဖူးလား..ရီးစားမရှိဖူးလား?..ဘာညာပေါ့။
ဟိုကလည်းအဟုတ်ထင်ပြီးအပီအပြင်တွေဖြေတာ။
ဘေးကလူတွေကနားထောင်ပြီးကြိတ်ရီကြတယ်။
အဲလိုမဟုတ်တာကိုအဟုတ်ထင်အောင်အတည်ပေါက်မြှောက်ပင့်လိမ်ညာပြောတာကို..
ကျနော်တို့က“ကြပ်တယ်”လို့ခေါ်တယ်။

လူသစ်ဆိုရင်အများစုက“ကြပ်”လေ့ရှိတယ်။ နောက်တော့ကျနော်တို့နေတဲ့လိပ်ခွန်းတောင်ကုန်းတောင်
“ကြပ်ကုန်း”လို့နာမည်တွင်သွားသေးတယ်။အဲလောက်ဆိုးတာ။
ဘာပဲဖြစ်ဖြစ်မြန်မာပြည်သားတွေပီပီဆင်းရဲတာ၊စိတ်မွန်းကြပ်တာ၊ ဒုက္ခရောက်တာမျိုးဆိုလည်းကြံဖန်ပြီးရီစရာတွေလုပ်၊ နောက်နောက်ပြောင်ပြောင်နဲ့စိတ်ထွက်ပေါက်ရှာကြတာပေါ့လေ။

နောက်ပိုင်းကျတော့ရာသီဥတုဒါဏ်၊အဟာရချို့တဲ့ပြီးခတ်ညံ့ညံ့အစားအသောက်ဒါဏ်၊ ကျန်းမာရေးချို့တဲ့တဲ့ဒါဏ်တွေနဲ့အဓိကကျတဲ့လက်နက်ကိုင်သင်တန်းမရှိပဲ၊ နဂိုရည်မှန်းချက်အတိုင်းဖြစ်မလာတဲ့ဒါဏ်၊အိမ်လွမ်းတဲ့ဒါဏ်တွေကြောင့်
စိတ်ပျက်ပြီးပြန်သွားသူတွေအစုလိုက်အပြုံလိုက်ပဲ။
အဓိက..ကတော့လက်နက်ကိုင်တော်လှန်ရေးလိုအင်တွေမပြည့်ကြလို့ပါ။
နောက်ပိုင်းရန်ကုန်စီးပွားရေးလောကမှာအောင်မြင်နေတဲ့ပြည်တော်ပြန်တယောက်ဆိုရင်..
သူမပြန်ခင်ပြောသွားတာလေးသတိရမိသေးတယ်။
“နောက်ဆုံးတော့..အာလူးနဲ့ပဲကြာကြာစားနိုင်တဲ့သူတွေပဲဟောဒီတောင်ကုန်းကြီးမှာကျန်ရစ်မှာ”..
ဆိုတာလေးပေါ့။

ကိုညို(အော်စလို)